O`zbekiston davlat xoreografiya akademiyasi rektori Toxtasimov Shuhrat Mahmutovich

Avvalo, Siz azizlarni O`zbekiston davlat xoreografiya akademiyasining ta’lim-tarbiya sohasida mehnat qilayotgan barcha pedagog xodimlarini  1-oktabr O’qituvchi va murabbiylar kuni bilan chin yurakdan samimiy tabriklab, eng ezgu tilaklarimni izhor etaman.

Dunyoda shunday kasb egalari borki, ularsiz hayotimizni tasavvur qilish qiyin. O’qituvchilar esa hayotimiz charog’bonlaridir. Kim bo’lmaylik, qaysi sohada ishlamaylik, barchamizga muallimlar ta’lim va tarbiya berishgan. Xalqimizda “Ustoz otangdek ulug’” degan so’z bor. Kimki bu hayotda biror yutuqqa erishsa, kasbidan e’zoz topsa, uning qalbida ustozlariga, birinchi o’qituvchisiga bo’lgan hurmat abadiy muhrlanadi.

Shuning uchun ham Sizlardan ta’lim va tarbiya olgan, o’zini oldingizda umrbod qarzdor deb his etadigan barcha insonlar nomidan Sizlarga har qancha minnatdorlik bildirsak shuncha oz. Hayot bor ekan, o’qituvchilik kasbi o’zining ma’no-mazmuni va olijanobligini, ahamiyati va hurmatini hech qachon yo’qotmaydi.

Muxtaram prezidentimizning tabrik so’zlarida aytilganidek “Ushbu qutlug’ ayyomda barchamiz bizga ilm o’rgatgan, hayot sabog’ini bergan jonkuyar, fidoyi o’qituvchi va domlalarimizga chuqur hurmat bajo keltirib, chin dildan ta’zim qilamiz”.  Haqiqatan ham, o’zining ko’z nuri, qalb qo’ri, butun borlig’ini yosh avlod tarbiyasiga baxsh etadigan o’qituvchi va murabbiylar mehnati, jasorati har qanday yuksak baholarga munosibdir.

Darxaqiqat xalqimizning eng katta boyligi jondan aziz o’g’il-qizlarimizning taqdiri, O’zbekiston istiqboli bizlarga ishonib topshirilgan ekan, farzandlarimizga yuksak mezonlar asosida ta’lim-tarbiya beradigan, yangicha, innovatsion fikrlaydigan muallim va o’qituvchilarni tayyorlash – bu eng og’ir vazifa bo’lib, juda katta mehnat va mas’uliyatni talab etadi. Shu boradagi o’ta mas’uliyatli vazifalar sizlardan o’z ustingizda tinimsiz ishlash, farzandlarimizni yangicha tafakkur, yuksak insoniy tuyg’ular bilan oshno etish, ularda mustaqil va ijodiy fikrlash qobiliyatini uzluksiz rivojlantirib borishni talab etmoqda. Bu vazifani mas’uliyat bilan ado etib kelayotgan Sizlar kabi fidoiy insonlar, kelajak bunyodkorlariga har qancha tahsin va tasannolar aytsak, arziydi.

Hurmatli ustozlar!

Bundan keyin ham farzandlarimizga zamonaviy ilm-fan va kasb-hunar asoslarini o’rgatish, yuksak insoniy tuyg’u va fazilatlarni singdirish, ma’naviy-axloqiy qadriyatlarimizni asrab-avaylash borasida bor kuch-g’ayratingiz, bilim va mahoratingizni ayamasdan astoydil xizmat qilishingizga ishonamiz.

Sizlarni O’qituvchi va murabbiylar kuni bilan yana bir bor tabriklab, barchangizga sihat-salomatlik, sharafli va mas’uliyatli faoliyatingizda kuch-g’ayrat, baxt va omad, katta muvaffaqiyatlar, xonadonlaringizga tinchlik-xotirjamlik, baxtu saodat, fayzu baraka tilayman. Doimo sog’-omon bo’ling, aziz ustozlar!